فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948

لقد أحسن المخرج باسل طنوس صنعاً عندما قام مؤخراً بإخراج فيلمه الوثائقي عروس الجليل الذي تحدّث فيه عن المناضلة الصابرة ابنة ترشيحا فاطمة الهوّاري (78 عاماً)، التي نجت من الموت المؤكد مرتين خلال قصف قرية ترشيحا بالطيران عام 1948، واصيبت بإصابات بالغة أعاقتها واقعدتها حتى يومنا هذا.

استقبلتني فاطمة الهواري في بيتها القديم في قرية ترشيحا وبدأت تقصُّ علي بتأثُّر كبير مأساتها عام 1948 وكأن الاحداث تجري اليوم وقالت: كان عمري 18 سنة، وبديت الطيّارات بتاريخ 29 اكتوبر 1948 تقصف ترشيحا، وانهزمنا عالوعَر واتخبّينا تحت الزتون، إحنا فلاحين بلا مآخذة وعنّا طَرْش كثير... خلّيت ابوي وستي واختي تحت الزتون واركبت الفرس وارجعت عالبيت، قلت لنفسي بلكي بقينا لوقت طويل في الوعَر أخذت الّلجَنْ والمُنُخُل والحاف وحطّيت شوال طحين عظهر الحصان وارجعت تحت الزتون.

في الغارة الاولى:

قِمتْ الخشب والحجارة عنّي والدم كان يِرْشي منّي

السيعة ستِّة الصبح كانت الدنيا رمضان قلت لأبوي بدّي اروح عالبيت عشان أعجِنْ وأودّي زواويد للرعيان اللي بشتغلوا عنّا، قللي متروحيش يابويْ، المدافع والطيارات عمتقصف البلد وهالقدِّة رصاصة صغيرة بتقتلك، قٌلت لابوي أنا ما بخفشْ يابا.. أجيت عالبيت وما كان فيه حدا، رحت على غير مطرح أقضي حاجتي، وكان عنّا بيت خارج في الحاكورة لأنُّه التقي (زي المجلس المحلي اليوم ومسؤولة عنُّه الأغاوات من العائلات المالكة)، ما سمحولنا نبني بيت خارج عشان مانضيِّق على الطريق. وأنا ببيت الخارج سمعت سليم، قرابِة مَرْت أخوي بحكي مع حدا بالحاكورة وبقول : سامع صوت طيّارة... والا طيارة حربية سودَة نازلة من نواحي لِمجاهِد قِبْليّ البلد، وصرخ لصاحبُه إنِبْطِحْ ع الأرض.. وبِديَتْ القنابل تنزل، هبّط بيت الخارج علَيّ ومن ثقل الحجارة والزينك والخشب نمت عالأرض وتصاوبت بالعامود الفقري، ما شفت الا الدنيا سودَة سودَة، قِمتْ الخشب والحجارة عنّي والدم كان يِرْشي منّي، في وقتها ما حسّيت بالإصابِة، فُتِتْ والتَقَحْت في البيت، اجَت أختي عالبيت لاقتني ممدودة.. قلتلها دَخْلِك إسعفيني، قام أبوي إجا من تحت الزتونات وجاب طَمَرْجي من البلد بس الشظايا كانت ماسكة باللحم، حمّلوني وأخذوني على صور في لبنان، لأنهم سكّروا الشوارع من نواحي نهريّا عشان يشجعوا الناس ترحل ع لبنان، في الطريق كانت الفرشِة تحتي تْخُبّ خَبّْ من الدم، وقبل العملية أجا الدكتور سعد الله يفحص الجُرح ودقوني إبرة بنج وقللي غنيلي غُنّاية (عشان يعرف إذا بعدني صاحيِة).. قلت: (دكتور سعد الله يا ابن الأميرِ..ولاقيت حصيرتك شلِّة حريرِ) (واللي تبُغضَك عميَة وضريرِه..وتقول عالدرب تعوا دلّونا)،عملت العملية وقعدت في المستشفى شهرين ونُص وروّحْت.

في الغارة الثانية :

سمعت اختي حدّي بتئِنّ وروحها طلعت قدّام عينيّ، وخديجة مرت عمّي تصرِّخ وتقول: النار ولّعَت بظهري

بعد 25 يوم بِدِي القصف والاحتلال النهائي للجليل، أخوي الكبير كان يقاتل في الجبهة، وأخوي الصغيركان مع أبوي وإمي عند العنزات، لأنُه الراعي إنهزم من القصف، قمت تخبّيت تحت السدِّة وناس تخبّت بغرفِة ثانية، هبّطت السدّة علي وعلى اللي كانوا معاي، سمعت اختي حدّي بتئِنّ وروحها طلعت قدّام عينيّ، وخديجة مرت عمّي تصرِّخ وتقول: النار ولّعَت بظهري.. قلتلها شو بدّي أعمل وأنا تحت الردِم لحتّى فحّمت وماتت، ومات احدعشر واحد من العيلة، وبسّ أنا وأختي فتحية نجينا من الموت، في هذا الوقت رجلَيّ نشلّوا وأنا مفكّرِه إنّه تقطّعوا. بعد ما وقّف الضرب سمعت خبِط رجلين عالطريق .. ناديت: هيي يللي عالطريق تعالوا اطلعونا من تحت الردِم.

رجع أبوي وإمي من الوعَر لاقو النار مولّعة في البيت، صاروا يدبّو الصوت وجابو المناكيش والصبّات، ولما طلّعوني قالولي : إقفي ، ووقعت من بين ايديهن، وقلتلهن مش حاسِّه برجليّ.

حمّلوني بسيارة لجيش الإنقاذ مع بنت خالي اللي كانت زي الفحمِة وماتت بعدين، ومتصاوبين ثانيين بذكر منهم واحد بقلولُه الكُبّة، وواحد من يانوح اسمُه حمد العلي، وأخذونا ع بيروت، وعملت عملية ونمت اربع تشهر في المستشفى، رجعت علبلاد مشلولة، الله ريتها انشالله رجعة سودَة عبريطانيا واميركا واسرائيل.

تنهدت فاطمة الهواري وقالت لي هاي قصتي وهيّاني عهالتخت وهاي الاحداث ما بتفارقني ولا دقيقة.

الطيرجي ايبي نتان يزور فاطمة الهواري طالباً أن تسامحهُ
مرّ الزمن وفي سنة 1995 أجا عالبلد الطيرّجي اللي قصف ترشيحا واسُمه ايبي نتان بعد ما سمع عن قصتي، عشان يزورني بعد ما صار رجل سلام وعمل سفينة السلام، طلب زيارتي وفات عالبيت ووقف على قبالي وقلتلُّه: شايفني منيح كيف عايشة، انتِ قتلتلّي احدعشر نفس من العيلة، وأنا مشلولة من يوم ما قصفت ترشيحا، ما خفت من الله؟!!، وقّّف ايبي نتان بدون حكي وما حسّيت إلا عينيه رَغْرَغَت بالدمع، وصرت أطَرفِشْ عالحكومة وعبريطانيا وأميركا لأنهم سببولي هالشّي وموتّوا عيلتي وعِيَلْ ثانية، قام نتان سحب حالُه وراح.

بعد ثلاث سنين أجا لعندي كمان مرّة مع شبكة تلفزيون ال CNN، وبنطبق عليهم المثل اللي بقولاجو غثبرة وكركبة عراسهُم انشاالله تقلب، قالولي ايبي نتان بدُّه يصالحِك، وقّف عقبالي كمان مرّة وقلتِلُّه: على ايش الصلح، بْتِغْدَرْ تخلّيني أوقِّف على رِجْلَيّ؟! ما دام أنا هيك لا يمكن.. وبطلُب من الله مثل ما شلّني البعيد انشالله ينشَلّ، قال نتان: لو بطلع بايدي كنت خليتك تمشي، قلت: هاي قسمتي وهاي قعدتي.

فاطمة الهواري ترفض أن تسامح ايبي نتان

بعد فترة سمعت ان ايبي نتان إنشلّ وطالب يشوفني، ورحت مع المخرج باسل طنوس ومصورين تلفزيون نزورُه، ما كان يغدر يحكي أو يحرِّك حالُه، وقلتلُّه: بعرف إنك ما بتغدر تحكي، بس أنا بدّي منك مكتوب بتِعْترِفْ فيه إنّك قصفت ترشيحا سنة 1948، إذا كنت موافق عالطلب اعطي علامة موافقة برموش عينيك، وردّ نتان بعلامة الموافقة ،بس اللي حواليه ما وافقوا. حاولت طول السنين اللي فاتت آخذ تعويض من الحكومة على أساس إني مصابة حرب، وكانت حجتهم انُّه العرب هُنِّ اللي ضربوني، قلتلهم العرب عندهم صرامي يضربو فيها.

نعم هي فاطمة الهواري بقيت رمزا للعدوان الوحشي الصهيوني في حربه الشرسة الظالمة ضد ابناء شعبنا عام 1948

من طرف **عائدون** الثلاثاء 05 أكتوبر 2010, 4:03 pm

شكرا لك أختي عائدة الى حيفا على تميزك في انتقاء المواضيع

ومن منا لا يعرف فاطمة الهواري ما زلنا نسمع بها من جيل الى جيل

ما دمتي متميزة فإن منتدانا متميز

الله يكثر من امثالها يارب

موضوع كتتتتير مهم ومميز

يسلمووووو

من طرف **tarshehagirl** الثلاثاء 05 أكتوبر 2010, 5:09 pm

هالموضوع من أهم المواضيع اللي طرحتيها اختي عائدة
فاطمة الهواري بقيت شوكة في صميم العدو بقيت لتروي لنا عن صمود وعزة ترشيحا ودليل قاطع عن ظلم ووحشية العدو الغاصب واجرامه

فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948 Hiltna-35a24989b4

فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948 Hiltna-35a24989b4

شكرا لمروركم بموضوعي
ومميز تواجدكم معي ديما وتشجيعي شكرلكم

من طرف **بسمة أمل** السبت 16 أكتوبر 2010, 2:44 pm

من طرف **ورود الحياه** الأربعاء 18 مايو 2011, 3:43 pm

يسلموووو كتير اختي على روائع ما قدمتي
الله يكثر من امثال فاطمة
صأمدة كأمها
دمتي بكل عافية
تقبلي مروري

فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948

فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948

رد: فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948

رد: فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948

رد: فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948

رد: فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948

رد: فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948

رد: فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948

رد: فاطمة الهوّاري من ترشيحا تنجو من الموت مرّتين بعد قصف الطيرجي ايبي نتان لترشيحا عام 1948