ذكريات ام عن ترشيحيا ترويها لابنها

من طرف **عاشقه فلسطين** الأحد 03 أكتوبر 2010, 9:04 am

سلام عليكم ورحمه الله وبركاته
ذكريات ام عن ترشيحيا ترويها لابنها
اليوم و بعد انصرافي من الدوام سالت امي ماذا تريدين ان تاكلي فردت علي ( يما بتعرف شو جاي على بالي ) قلت لها اطلبي يما قالت ( جاي على بالي آكل سلطة كبوس مع بيضة مقلية بتسبح بزيت زيتون الضفة ) فعلا جبتلها الكبوس و الحمد لله اني لا انقطع من زيت زيتون الضفة فكل عام يحضر لي زميلي في العمل تنكة زيت زيتون
سألتها شو اللي خطر على بالك يما قالت ( يما هاي الأكلة هي و الزعتر و قرون الخروب و الشومر كنت اموت عليهم بترشيحا على طول اعمل سلطة و اقليلي بيضة و اغمس وآكل ) بس يما هدا مش كبوس ولا هادا زعتر ولا خروب متل اللي كان بترشيحا كنا لما ننزل الوعر نشم ريحة الزعتر و الشومر و الخروب على بعد كيلو .
تنهدت وقالت ( على الله يا ترى بضل عايشة لارجع لترشيحا الله اعلم )

وتنهدت مرة تانية و قالت يما شو رايك اسمعك هالعتابا عن ترشيحا حافظيتها من زمان على لسان ترشحاوية قلتلها اي بس شوي شوي لاكتبها .
وصارت تقول :

والصبر يا مبتلي والصبر يا ايوب
والصبر جبته معي تا ينمحى المكتوب
الصبر جبته معي من يوم هجرتنا
وحجارة الدار يا يمّا تبكي يوم فرقتنا

نزل دمعي على خدي وهوّد
عَ اللي رحل من ترشيحا وما عوّد
يا رايح على ترشيحا، هيه يا معوّد
سلم على اهل بلدنا وعلى الصحاب

اجيت اصبر والقى الصبر مرّ
وريقي عقد بحلقي يا يمّا مر
كل ما اجي صوب بلدنا وأمرّ
واقول وين اهاليها والصحاب

ورحت صوب ترشيحا حتى اسلّي همومي
لقيتها خالية ومليانه هموم
سالتك يا ترشيحا وين اهاليك عمومي
هدوك هاجروا وما منهم حدا

ورحت صوب ترشيحا واحسبها الزمن الاول
ويا دمع عيني ع حيطانها نزل
وسألتك يا ترشيحا وين صحابك الاول
هدوك رحلوا ورحيلهم طوّل

نزل دمعي على خدي غريبه
وتبكي العين عشانها غريبه
يا ربي لا تموتني غريبه
غير بين اهلي والاصحاب

ودمعي يا يمّا على خدي وحابس
ويشبه السيل بالوديان حابس
امانه يا يّما ان متت حطوني بنواعش
واقبروني بترشيحا ع دروب الحبايب

لقعد على الدرب واستنّا الهوى القبلي
واقول من ريحه ترشيحا وشم يا قلبي
لأقعد على الدرب واستنا الهوى الشمالي
واقول من ترشيحا اهل بلدنا وخلاّني