ترشيحا في ذاكرة

والصبر يا مبتلي والصبر يا ايوب
والصبر جبته معي تا ينمحى المكتوب
الصبر جبته معي من يوم هجرتنا
وحجارة الدار يا يمّا تبكي يوم فرقتنا

نزل دمعي على خدي وهوّد
عَ اللي رحل من ترشيحا وما عوّد
يا رايح على ترشيحا، هيه يا معوّد
سلم على اهل بلدنا وعلى الصحاب

اجيت اصبر والقى الصبر مرّ
وريقي عقد بحلقي يا يمّا مر
كل ما اجي صوب بلدنا وأمرّ
واقول وين اهاليها والصحاب

ورحت صوب ترشيحا حتى اسلّي همومي
لقيتها خالية ومليانه هموم
سالتك يا ترشيحا وين اهاليك عمومي
هدوك هاجروا وما منهم حدا

ورحت صوب ترشيحا واحسبها الزمن الاول
ويا دمع عيني ع حيطانها نزل
وسألتك يا ترشيحا وين صحابك الاول
هدوك رحلوا ورحيلهم طوّل

نزل دمعي على خدي غريبه
وتبكي العين عشانها غريبه
يا ربي لا تموتني غريبه
غير بين اهلي والاصحاب

ودمعي يا يمّا على خدي وحابس
ويشبه السيل بالوديان حابس
امانه يا يّما ان متت حطوني بنواعش
واقبروني بترشيحا ع دروب الحبايب

لقعد على الدرب واستنّا الهوى القبلي
واقول من ريحه ترشيحا وشم يا قلبي
لأقعد على الدرب واستنا الهوى الشمالي
واقول من ترشيحا اهل بلدنا وخلاّني

من طرف **tarshehagirl** الإثنين 20 سبتمبر 2010, 11:04 pm

شكرا كتير اخت ام يزن على هالكلمات الجميلة
انا بنت هالبلدة الرائعة بكل مافيها وشهادتي اكيد مجروحة فيها
وكل شي تحت عنوان ترشيحا بيجذبني مو عنصرية بس وفاء لبلدتي
يسلمو الك ومنتمنى نشوف مشاركات الدائمة بمتل هالكلمات بكل مدن وبلدات فلسطين مو بس ترشيحا

من طرف **رامي السعيد** السبت 02 أكتوبر 2010, 8:54 am

أبدعت ام يزن بنقل هذه العبارات وما أجملها لو سمعناها على شكل عتابات بصوت أهالي البلدة

من طرف **عائدون** الثلاثاء 12 أكتوبر 2010, 10:27 pm

مشكورة أخت أم يزن على هذه العتابات التي تصدر من امهات ترشيحا

وما زلنا هنا في مخيم النيرب نسمعها من كبار السن ويتعلمها الاطفال لتبقى في ذاكرة الاجيال القادمة