الحاجّة حورية درويش (إم أحمد) والدة الراحل الكبير محمود درويش في لقاء خاص

قلتله لمحمود لمـّن هيك بقول الدكتور يَمّا بَلاش تعمل العملية وبَلاشْ تسافِرْ ...

الحاجّة حورية درويش (إم أحمد) والدة الراحل الكبير محمود درويش في لقاء خاص مع الحقيقة:

قلتله لمحمود لمـّن هيك بقول الدكتور يَمّا بَلاش تعمل العملية وبَلاشْ تسافِرْ ...

الشقيقة سهام: كل حياتنا وإحنا نبكي على محمود وهو في الغُربِة وكل ما كان ييجي وكل ما كان يروح

أجرى اللقاء رفيق بكري

لم يكن من السهل عليّ أن أدخل غرفة والدة الراحل الكبير محمود درويش الحاجّة حورية درويش (أم أحمد) لتقديم التعازي ولإجراء هذا الحوار فهي بدون شك تمر في أصعب اللحظات، إلا أن (سهام) شقيقة محمود ساعدتني في ذلك ودخلنا معاً الى تلك الغرفة التي كان درويش يلتقي بها والدته، فوجدت أم أحمد تجلس على سريرها ... اقتربت منها وقدمت لها التعازي وسألتها: متى التقيت بالمرحوم محمود آخر مرة؟ .. أم أحمد: التقيت فيه قبل ما راح يعمل العملية بيومين وقللي بّدي أروح على رام الله أبات ليلة وبعدها على الأردن أبات كمان ليلة وأطلع على أميركا عشان اعمل فحص .. سألتو: شو بدّك تساوي يا محمود هناك، بقـُللي: بدي أعمل عملية .. قلتلو: شو بدك بالعملية ما إنتي بِالصلاة على النبي بصحه وعافيه ومنيح .. قللي محمود: صرت مشاوِرْ الدكتور وقللي إذا عملت العملية خِطرة وإن ما عمِلتها كمان خِطْرِة وإني حُر .. قلتلو: لمـّن هيك بقول الدكتور يَمّا بَلاش تعمل العملية وبَلاشْ تسافِرْ .. بَسْ محمود تركني وراحْ.. تسهـّل بس هايْ المرَّة ما رِجِعْ.

الحقيقة: كان مبيّن على محمود إنـّو جاي يودعكْ أو خايف؟

ام أحمد: والله لا كان خايف ولا هامـّو .. كان يضحك ومبسوط وكان أخوه بدّو يجوّز بنتو، طلع لعندو وسِهر لسيعه متأخرة، ومشي الصبِحْ وما كان مْبيّن عليه إشي.

الحقيقة: كيف تلقيتي خبر الوفاة؟

ام أحمد: أول يوم بعد العملية قالوا محمود عِمل العملية ونجحت .. انبسطنا وقـُلنا الحمد لله على السلامة الحمد لله على السلامة الله كبير، نِمْنا على قولة الحمد لله على السلامة .. الصبح ثاني يوم والا بقولو حالة محمود درويش الصحية مِش منيحة وطِلع هذا الخبر المشؤوم.

الحقيقة: شو بدك تقولي للناس اللي بتحب محمود درويش؟

إم احمد: الناس كلها زعلت على محمود وحتى صحابو زعلوا أكثر مِنـّا .. محمود قعد عندهن كل عـُمرو .. أنا بدي أحْمِدْ فيه؟! هُنِّ اللي بقولوا عنـّو لانو عاش معهن .. محمود كان دُغري مشي هيك .. لا يمين ولا شمال.

الحقيقة: محمود كتب قصيدة بالغربة بقول فيها أحن الى خبز أمي وقهوة أمي .. وعاوَدْ شرب من قهوتك وحضنك.

إم احمد : نعم كتب عن قهوة إمو ولمسِة إمو ولحبل الغسيل اللي على حيط إمو .. والله يا عَمّي إسـّا مش عارفِه شو بدّي أحكي.

الحقيقة: لما شُفتيه أول مرّة بعد ما غاب الغيبة الطويلة شو قلتيلو؟

أم أحمد: غنيتلو كثير .. كان كل ما يوخذ تصريح وييجي يزورني كنت اقللو :

محمود درويش إطلع على الطيارة واتأنّى كل شباب فلسطين بحضرتك تستنى

ريتك بهالرحلة يا محمود تتهنى تعاوِدْ علينا ويصير الفرح عِنـّا

محمود درويش يا سيفين يوم الحرب يا شمع مكـّة يا ضاويات الدَرب

إطلع على الخطاب يا قويّ القلب واضرب بسيفك وعلـّق مشانق عالدرب

وقلت كثير بس انسيت ...

الحقيقة : هذا الشعر إنتي كتبتيه يا أم احمد؟

ام احمد: آه كل هذا كتبتو من عقلي .. قلت كتير وغنـّيت كثير .. .

الحقيقة: يعني مش بالصـُدفة محمود طِلع شاعر؟

ام احمد : قلت عتابا وشعر كثير، ولما كان بيجي مع محمود ضيوف كنت أقول:

مرحَبابْكو يا ضيوفنا لِعزاز ...... يا ذهب عتيقْ شِلتو للمـُعتازْ

وحياة تـُربِة النبي راحولو عاجَمَلْ هزّاز.... إن غِبتو عن العين لكن في القلب عزازْ

كنت كل ما بيجي أغنيلو .. ولما مرضت ورُحت على السبيطارْ وروّحت على البيت أجا محمود يزورني وقـّفت على الدرج وغنيتلو. ويومِن عِمِل العملية بباريس والعملية نجحت بيجي ستين غِنّويه غنيتلو .. أما إسا مرِضت وهذا الخبر هدّني.

الحقيقة: شو بدّك تقولي إسـّا بِوداعو؟

إم احمد : لأ لأ إسّا بقدَرش ...

قالتلها سهام بنتها قولي عتابا يما لمحمود .. إم أحمد: مش قادرِه أقول، مِش بإيدي... وبعد فترة صمت حزينِة قالت إم أحمد:

مسافِر يا يما .. جيتْ أودعَكْ وما ليش خاطِر

وقلبي عالسفرْ ما لـُش خاطِرْ

ربّي رشاشْ والدنيا تماطِرْ

تَنِشْبَعْ من شوفتك يا بنيي ..

سهام شقيقة الراحل محمود درويش قالت لـالحقيقة:

اريد ان أعزي كل من يحب محمود درويش أينما كانوا، لقد حاول أخي محمود عشيّة سفره الأخير أن يخفي ما بقلبه من قلق، ومع ذلك بدا على وجهه قليلاً منه.

الحقيقة: كان وقع الخبر عليك صعب؟

سهام : كثير صعب ..شقيقي محمود كل حياتنا واحنا نبكي عليه، وهو في الغُربِة، وكل ما كان ييجي، وكل ما كان يروح.

يسعدني ان اكون اول شخصا يزور الموضوع ويضع بصمته بهذا موضوع مهم

هذه هي مراه التي انجبت لنا شاعرا قديرا مثل محمود درويش رحمه الله واسكنه فردوس اعلى

بارك الله فيكي

ننتظر مزيد من تميزك

يعطيكي الف عافيه

من طرف **ورود الحياه** الجمعة 10 يونيو 2011, 6:43 pm

بارك الله فيكِ اختي على روائع ما قدمتي
جزاك الله خيرا
رحم الله الشاعر محمود درويش و يشرفني ايضا ان اكون مِن المطلعين على هذا اللقاء الرائع
يسلموووووووووووووو كتير
دمتي بكل عافية اختي
تقبلي مروري